असामान्यांचे सामान्यत्व

सामान्य लोक सामान्यांप्रमाणे राहतात.
असामान्य लोक असामान्यांप्रमाणे राहतात.

असामान्यांना त्यांच्या असामान्यत्वाचा अनुभव असतोच. ‌त्यामुळे ते वेगळं काही असामान्य करत नाहीत. त्याची त्यांना आवश्यकताही नसते. ते जे सामान्यपणे करतात तेच सामान्यांसाठी असामान्य असते.

तर मग असामान्य नक्की कोण?

खरा असामान्य म्हणजे असा सामान्य ज्याला असामान्य बनायचं असतं, त्याच सामान्य लोकांमध्ये राहून !

अशा सामान्याला असं असामान्य बनायचं असेल तर असामान्य अशी मेहनत करावीच लागते.
पण असं असामान्यत्व तिथपर्यंतच टिकेल जोवर ती व्यक्ती स्वतः सामान्य राहून असामान्य बनण्यासाठी असामान्य अशी मेहनत करेल. नंतर एकदा का तो सामान्यांच्या नजरेतला असामान्य बनला की खरे तर तो असामान्यांमधला सामान्यच असेल ना !

म्हणजेच, असामान्यत्व हे प्रतिष्ठा नाही तर तो एक प्रवास आहे. असा प्रवास जो व्यक्तीला सामान्य असण्यापासून आसामान्य होण्याकडे नेतो.
व्याकरणाप्रमाणे असामान्य हे एक व्यक्ती विशेषण झालं. माझ्या मते, हे एक प्रवासवर्णनात्मक विशेषण म्हणल्या जावं.

सामान्य व्यक्तीला असामान्य बनल्यावर उगाच 'आपण असामान्य आहोत' असं वाटू लागतं. हि त्या व्यक्तीची गर्व अवस्था झाली. म्हणजे त्या व्यक्तीचा प्रवास थांबला आणि तो त्या पातळीच्या असामान्य व्यक्तिसमूहातील सामान्यच बनला ना !

तेव्हा, जर खरं असामान्य बनायचं असेल तर हा असामान्यत्वाचा प्रवास सतत आणि निरंतर चालू राहायला हवा. त्यातंच तर खरा असामान्यपणा आहे ना !

#मीप्रतिक